Oqtay Gülalıyevlə bağlı AÇIQLAMA

Türkiyənin İstanbul şəhərindəki Amerikan Xəstəxanasında müalicə olunan hüquq müdafiəçisi Oqtay Gülalıyevin dünən 2-ci dəfə əməliyyat olunacağı gözlənilirdi. Bu barədə onun oğlu Alı Gülalıyev sosial şəbəkədə məlumat yayıb.

Onu sözlərinə görə, hüquq müdafiəçisinin durumunda müsbət gəlişmələr olmasına baxmayaraq, həkiminin etdiyi ağrı oyadıcıya O.Gülalıyev hələ ki, çox zəif cavab verdiyindən iki gün əvvəl MRİ ediblər: “Nəticəsinə görə beynində akut hidrosefali (kəskin surətdə su artması) yaranıb.Bu səbəbdən sabah tezdən atam növbəti dəfə əməliyyat ediləcək. Beynində olan artıq suyun təmizlənməsi üçün başına şunt qoyulacaq”.

Oğlu Təbriz Gülalıyev ötən həftə yazıb ki, Oqtay Gülalıyevin səhhətində müsbət hallar artmağa başlayıb. Belə ki, infeksiyalardan və böyrəkdə olan geriləmələrdən tam azad olub. Hərarəti normaldır. Həmçinin hər iki gözlərini açaraq, əllərini hərəkət etdirir.

Oqtay Gülalıyevi ziyarət edən jurnalist Əvəz Zeynallının çəkdiyi videolardan da görünür ki, o, gözlərini açıb, qarşısındakına baxır, ağzını tərpədir. Bütün bunlar nəyə işarədir? Aparılan növbəti əməliyyat nələri dəyişəcək?

“Yeni Müsavat”a danışan professor Adil Qeybulla bildirdi ki, bu, Oqtay Gülalıyevin getdikcə komadan ayılmasına olan işarələrdir: “Komanın dərəcəsi məsələsi var. Bu, artıq yüngül dərəcəyə doğru dəyişir. Oqtay Gülalıyev cavan adamdır, resursları var və təbii ki, onun ayılma ehtimalı çox yüksəkdir. Sadəcə olaraq biz arzu edirik ki, beyin maksimum az itkilərlə ayılsın. Ancaq nəticəni birmənalı proqnozlaşdırmaq da çətindir. Travma beyinin sol yarımkürəsində olub. Həmin hissədə isə nitq, yazı mərkəzi və sairə var. Ona görə də hələ biz bilmirik ki, beyin hansı imkanlarını saxlamaqla özünə gələcək. Bunun üçün zaman lazımdır. Oqtay Gülalıyevin komadan ayılması üçün yavaş-yavaş reaksiyaların əmələ gəlməsi müsbət haldır. İrəli doğru gedişlərin göstəricisidir. Əsas məsələ ilə tam ayılandan sonrakı funksional imkanlardan asılıdır”.

Professor dedi ki, onun ətrafında baş verənləri hazırkı məqamda hiss edə bilər: “Yanında danışanları, səsləri hiss edə bilər. Ancaq əsas məsələ huşun özünə gəlməsidir. Bundan sonrakı dövr də əsas məsələdir. Həmin dövrdən sonra müayinələr aparılacaq. Yalnız bundan sonra beyinin funksiyaları ilə bağlı dəyişikliklər məlum olacaq”.

Oqtay Gülalıyevin yanında saz havasının qoyulmasını, səsli musiqinin dinlədilməsini doğru saymayanlar da var. Həkim olmayan şəxslər sosial şəbəkələrdə kəskin iradlarını bildiriblər ki, beyindən travma alan şəxsin yanında yüksək səslə qəmli saz havası qoşmaq olmaz. Bu barədə professor aşağıdakıları söylədi: “Oqtay Gülalıyevin ətrafında baş verən proseslər hələ başdan bəri müəyyən problemlərlə oldu. Bu işə təəssüf ki, müdaxilə edə bilmirəm. Qeyri-peşəkar açıqlamalar, yanaşmalar çoxdur. Bunlara fikir bildirmək istəmirəm. Mənim üçün bu insan dəyərlidir. Gördüyü işlər, fəaliyyəti ilə bağlı ona hörmətim yüksəkdir. İstəyim də odur ki, tamamilə komadan ayılsın. Hamımızın arzusu Oqtay Gülalıyevin ayılıb, cəmiyyətə qarışmasıdır. Qalan prosesləri isə orada ailə özü idarə edir. Ona müdaxilə edə bilmirik, təbii olara”.

Oqtay Gülalıyevin girdiyi son əməliyyatla bağlı Adil Qeybulla bunları söylədi: “Bu əməliyyat Türkiyədə ona ikinci dəfədir ki, aparılır. Əməliyyat həm də beyinin kompressiyasının azalması üçün həyata keçirilir. Düşünürəm ki, Türkiyədə ona aparılan taktikaların hamısı düzgündür. Əslində burada da yanlış nə isə aparılmayıb. Hər halda travma ağır olduğu səbəbindən beyinin özünə gəlməsi üçün bir zaman lazımdır. Bu zamanı gözləməliyik”.

Qeyd edək ki, oktyabrın 29-u saat 17:20 radələrində paytaxtın Nəsimi rayonu ərazisində - 28 May küçəsi ilə Puşkin küçələrinin kəsişməsində taksi fəaliyyəti ilə məşğul olan sürücü Kənan Abdullayev idarə etdiyi “Hyundai Accent” markalı avtomobillə yolu keçən piyada, hüquq müdafiəçisi Oqtay Gülalıyevi vurub. Nəticədə ağır xəsarət alan hüquq-müdafiəçisinin beyninə qan sızıb. Oktyabrın 30-da “City Hospital”da O.Gülalıyevin üzərində cərrahiyyə əməliyyatı keçirilib.

Heydər Əliyev Fondunun prezidenti, Azərbaycan Respublikasının Birinci vitse-prezidenti Mehriban Əliyevanın tapşırığı ilə Fond hüquq müdafiəçisi Oqtay Gülalıyevin müalicəsi ilə bağlı məsələlərin həllini üzərinə götürüb. Fond O.Gülalılyevin müalicəsinə yardım məqsədilə Türkiyədən mütəxəssislər dəvət edib. Fondun təşəbbüsü ilə Türkiyədən gələn mütəxəssislər O.Gülalıyevi Bakıdakı Respublika Neyrocərrahiyyə Xəstəxanasında müayinə ediblər. Daha sonra O.Gülalıyev Heydər Əliyev Fondunun ayırdığı xüsusi ambulans təyyarə ilə Türkiyəyə aparılıb və orada müalicəsi davam etdirilir.

Tarix: 11 Yanvar 2020, 10:24

Xəbər lenti